Parents’ Corner

我究竟可以點樣幫佢？

創造英語環境：有啲學生對英文故事書愛不釋手，但有啲學生見到英文就想瞓。其實，能力稍遜嘅學生，往往都有一個共通點，就係喺佢屋企同埋成長嘅環境入面甚少有運用英語嘅機會。運用嘅意思唔係話狂做英文練習、背單字，而係確確實實地喺日常生活入面運用英文，例如睇英文嘅電視節目或者電影、聽英文歌、用英文同其他人溝通、睇英文嘅餐牌等等。缺乏運用英語嘅機會，除咗少咗學習機會之外，最重要嘅係小朋友會唔明白做咩要學英文，會覺得呢個語文同自己冇乜切身關係，因而欠缺動力學習。所以，要小朋友有學習英語嘅動機，首先就要「詐詐諦」創造一啲英語嘅環境，簡單如屋企電視或電腦嘅語言設定，食飯時睇咩電視節目，週末去咩食肆，爸爸揸車嘅時候播咩歌，屋企請嘅姐姐識講中文定英文，呢一切一切，其實都可以「造馬」。喺日常生活入面創造英語環境，對於就讀中文學校嘅同學嚟講尤其重要，因為佢哋日常接觸英文嘅機會實在唔多。如果能夠從小就比小朋友多啲接觸英文，放眼世界，小朋友睇到學英文嘅重要性，學習就自然事半功倍。

學習英文拼音：有好多同學見到一啲新嘅英文字都唔識得點樣拼讀，就算勉強拼讀出嚟同真正嘅發音都相差甚遠。唔識拼音，唔好以為淨係發音嘅問題，同學嘅串字、詞彙學習、朗讀、聆聽等等都會相對較弱。所以就算你嘅小朋友而家已經係中學生，但串字同拼讀都好弱嘅話，我都會建議佢抽啲時間先密集式學習phonics，熟練後再學習英文嘅速度就會快好多，吸收能力亦都會高好多。

拆解根部問題：有唔少英文較弱嘅同學，其實對於小學所謂學咗嘅文法都唔清唔楚，啲Tenses撈亂晒，個irregular verb table 唔記得晒，冇乜plural/singular嘅概念等等。喺咁弱嘅基礎上再學一啲進階嘅文法，小朋友會覺得好困難，繼而好想放棄。所以無論係乜嘢年紀嘅人學英文，其實首先都係要搵出自己喺基本功入面欠缺咗啲咩，然後就由嗰啲基本功開始，好似砌積木咁，由個底慢慢砌返上去。萬丈高樓從地起，實在唔係一朝一夕嘅事，但如果之前實在係有某方面嘅知識比較唔穩陣，就一定要俾人花更多嘅時間同心機去搞番好佢先，再慢慢向上爬。

寜淺寞難：好多家長為咗培養小朋友嘅閱讀興趣，都會買啲英文故事書比佢哋睇，甚至帶埋佢哋一齊去揀。但其實喺香港買英文故事書嘅話，確實係有難處嘅，因為外國小朋友嘅書對於同齡嘅香港小朋友嚟講英文會比較深，就算封面有幾靚，題材有幾吸引，睇唔夠10頁就會乖乖咁將本書放返好喺書架，不再沾手，因為根本越睇越唔明。所以喺書局買書嘅時候，除咗要睇吓印喺書嘅背面嘅故事簡介，最重要係揭開內頁，要小朋友認真睇四至五頁，睇吓明唔明白講緊咩。如果睇到一頭霧水，可能本書嘅英文程度太高，咁就要再揀過。有啲家長可能會認為，「有冇搞錯呀？你中學生仲睇啲咁低能嘅書？」。我嘅睇法係，唔怕易，最緊要佢有興趣。易嘅話，佢睇得明，有滿足感，有成就感，自然覺得英文唔係太難，會有動力去睇其他英文書。如果堅持佢要睇返「應有程度」嘅英文書，個結果通常都只得一個，就係本書長期失蹤。

恆常鞏固知識：英文喺好多同學心目中都係一個好虛無飄渺嘅科目，內容似有還無，唔同其他科例如歷史或者物理咁樣，有確實嘅考試內容。正因為咁，同學平日投放喺呢個科目嘅時間亦會比較少。早幾日同個中五學生上堂，佢話學校老師嗰日教生字，於是我叫佢講兩個俾我聽吓。佢諗咗幾分鐘連一個都諗唔到。其實，中學生每日都會接觸好多新嘅英文詞彙，但當中有幾多個詞彙唔係過幾日已經唔記得咗呢？有啲同學好乖，將學咗嘅生字抄落筆記簿，寫埋解釋同例句。雖然係做多咗一步，但往往就係仲爭一步，就係溫習！如果能夠兩三日就溫習一次，呢啲詞彙就屬於你嘅，相反，如果冇溫習嘅話，佢哋大多只會繼續做筆記簿內嘅一份子。同樣地，學過嘅英文文法亦都要間中溫習，檢視返之前自己嘅錯誤，從而鞏固知識。英文科，其實有啲似同枱食飯各自修行，得唔得，就睇你有冇下苦工。

從錯誤中學習：學校一派番份英文試卷，同學最緊張嘅就係分數。究竟老師有冇扣多咗我分？究竟我係班入邊算考得好唔好？我高分過上次定低分過上次？講完一大輪，絲毫都冇打算鑽研返篇閱讀理解，例如有啲乜嘢生字考嘅時候唔識要學番，或有啲咩句式特別複雜而令到自己睇唔明個內容。至於作文考試，學校老師就考試題目派番嘅幾篇範文，就被淪為廢紙幾張。其實，考試係一個好好嘅學習機會，但就要視乎同學有冇好好把握，將自己再推高一層。如果家長可以由小灌輸呢個概念俾小朋友，相信佢哋嘅學習一定會更有成效。

堅持學習：「有其父必有其子」呢句話，做老師嘅相信都會深切體會，但做父母嘅就未必好為意。嚟我度上堂嘅學生，林林總總，當中特別有一種學生，英文已經屬頂尖名校入面全級數一數二，但都係會每星期堅持嚟上英文補習課。呢類學生，甚少請假，原因係佢哋嘅父母有一種對學習嘅堅持，而呢種堅持往往亦都喺佢哋嘅仔女身上可見一班。相反，有一啲同學好容易因為唔同嘅事情而請假，例如聽日有其他科嘅小測，學校功課未做晒，要同婆婆食飯等等。如果家長能夠鼓勵小朋友好好安排時間，唔隨便缺席，其實亦都係最好嘅身教，讓小朋友懂得安排每週嘅時間表，唔俾自己「射波」嘅藉口，堅持學習，持續進步。

查字典：其實好奇心喺學習上真係好緊要。好多時我問啲新同學一向用開咩紙本或者網上字典，佢哋會話原來佢從來都冇用過字典。於是我就問佢咁平時你遇到啲字唔識會點，佢哋會答‘唔理佢㗎！’，或者有啲會答我用Google 翻譯。的確，當我哋睇書或文章嘅時候，唔應該吓吓查字典，而係應該嘗試從篇文章嘅來龍去脈去估吓個字點解。不過，睇完之後其實都應該自己揀返幾個覺得重要嘅生字，查返字典，確認一下自己估嘅解釋啱唔啱。最重要嘅係，要睇返字典入面嘅例句，理解究竟嗰個字可以點樣喺唔同嘅情況下運用，會唔會需要同其他嘅字一齊用，有冇乜嘢特別嘅文法要注意，同埋正確嘅發音究竟係點樣。有好多英文較弱嘅同學都有個習慣，就係只會眼金金望住隻字，而冇嘗試去探究佢嘅用法，或者學習個字嘅發音。呢一類同學仔，除咗好多時會用字不恰當之外，亦好容易會將啲字撈亂晒，例如你問佢‘自信’(confidence)英文係咩，佢會答咗另一個c字頭又長長哋嘅字。但如果喺學個字嘅時候學埋個發音，呢類情況就會大大減少，同學能夠記得個生字嘅機會亦都會大大增加。